dou3a2

يا ربّي يا ستار، يا خالق الليل والنهار، والتاكسي والكار، والناس المحترمة والناس اللّي عملت العار.

أنا المدوّن المعروف في بلاد المسفوف، حيث المحزوق والمرخوف والترهدين والخوف، بلاد الناس اللي تنفخت كيف الحلّوف، وديما تشكي من الظروف

جيتك يا ربي يا أحسن رب، ميّت بالتعب، نشكي من الكرب، وجوه الخشب، اللي ما يعجبهاش العجب، وما يـشبـّعهاش الذهب.

يا ربي يا أقوى ربّ، راهو شيء يركّب العصب، الناس مرضت بالكلب، ما تسمع كان هب هب، جيتك يا ربي باش ندعي... على اللّي كان السبب

اللي كان السبب واللي في بالي، هو اللي ما يرحمش الصغير والضعيف و الزوّالي، تموت الناس ويقول "وأنا مالي؟"، يعفـّس غيرو ويقول "أعمالي"، في بالو غيرو بوهالي، وهو أكبر بوهالي، ياكل كيف المنشار، ليل مع نهار، لا يشبع ولا يقول عملت العار، ولا تخطر في بالو أفكار، أنو باش يجيه نهار

(أنا نقول وإنتوما قولو ورايا "آمين" ، باهي؟)

يا ربي عرّيه في كلسون وعدّي عليه 500 كميون،

يا ربّي إجبدلو عينيه ونحيلو دين والديه،

يا ربي قصّلو صبع و شطر خشم، بتسترة وإلاّ بجلم، وأعورو بقلم، وقعّدو على "البوتو" اللّي يعلّقو فيه العلم، وهبط عليه الهم، ولا تفرّحو بصغير ولا بوحم، وإحرمو من حاسة الشمّ، ولا ترحملو لا بو ولا جد ولا عمّ

يا رحمان يا رحيم، إفرشو كيف الكليم، وإلاّ أمسخ دين والديه بهيم، بجاه سيدنا موسى وعيسى وإبراهيم،

يا ربّي فتـفتـلو في ركايبو "المينيسك" وهبّط عليه "الفيسك" وخلّي حياتو في "الرّيسك"،

جيتك بجاه سيدي بلحسن، لاتوكلو عسل ولا سمن، ولا تسمّعو فن، وقرطس بوه في كفن وإدفنو في كدس عفن

يا غفور يا رؤوف، مشّيه طروف طروف، كيف ما يمشي في العيد الخروف... أما قبلها أعميه خلّي يولّي مكفوف ونركحو فيه بالكفوف،

يا ربي عيّشو على الفول وإجعل ريحتو شايطة بالبول، وسيّب عليه وهو راقد 25 "بيتبول"، راهو فرخ كبّول

يا ربي كبّلو سعد والديه، وأصحابو وأحبابو وإمّاليه، راهو هذا الكلّ وشويّة فيه، آمين يا رب العالمين

وآخر دعائي أن أستغفر الله لي ولكم والسلام عليكم ورحمة الله وبركاته